.

Maligayang Linggo ng Wika :)

Ang pagdiriwang ng kapanganakan ay isa sa pinakamasayang araw sa ating buhay.
Hindi lang sa dahilan na mayroong pagtitipon kasama ng pamilya at mga kabigan kundi eto ay isang pasasalamat sa Dakilang Lumikha sa pagpapahintulot NIYA na tayo ay mabuhay pa dito sa mundong ibabaw.

Ikalabing-siyam ng Agosto ng akoy isinilang ng aking mapagmahal na magulang sa bayan ng Lungsod ng Lipa, Batangas. Bunso man sa limang magkakapatid, mababatid pa rin ang kaligayan ng pamilya sa aking pagdating. Bilang ganti sa kanilang kabutihan, isini-alang-alang ko ang magagandang asal na aking natutunan, pinagbuti ko ang aking pag-aaral para sa pagtupad ng mga pangarap at higit sa lahat ay lumaki na may takot sa Diyos.

Salat man sa buhay, kami ng aming pamilya ay mayroong pagtitipon tuwing may kaarawan. Hindi man namin naranasan ang marangyang pagdiriwang ay masaya pa rin kami nagsasalo-salo sa lutong "pansit" na inihanda ng aming mapagkalingang Ina. Sabi nga nya ito ay sumisimbolo ng mahabang buhay.

Sa kasalukuyan, nasa ikatlong taon na ako ng pandiriwang dito sa Gitnang Silangan.
Hindi ko malilimutan ang unang kaarawan ko dito dahil dito tuluyan bumuhos ang aking mga luha ng marinig ko ang pag-awit ng aking Ina at mga pamangkin ng Maligayang Kaarawan at ang pagbati ng mga dating katrabaho sa Samsung na itinuring kong ikalawang tahanan. Noon ko naramdaman ang aking pangungulila. Ang hirap pala bilangin ng mga araw :(

Salamat sa Diyos sa pagbibigay nya ng lakas ng loob at natapos din ang aking pagdadalamhati. Kapos man ang masayang pakiramdam ko ngayon, dahil sa malayong pamilya, mababatid parin ang kasiyahan dulot ng aking mga kaibigan :)

Saksihan nyo na lamang ang mga litratong ito, isang patunay na masaya na ako :)

Sa tatlong dekada ng pakikibaka, hindi pa sapat ang aking mga karanasan.

Marami pa akong pagdadaanan at marami pa akong mga bagay na dapat matutunan kasama ng mga taong lubos na nagmamahal sa akin :)

Ang aking puso ay nag-uumapaw sa kaligayahan :)

Ikinagagalak ko ang inyong masayang pagbati, mga regalo at preparasyon
para sa masayang araw na ito ng aking buhay...

Salamat muli sa ating Poong Maykapal na lumikha, sa aking Inay at Tatay, mga kapatid, pamangkin at kaibigan sa walang humpay na pagmamahal, pag-aalaga at suporta . Tunay na kaligayan ang dulot ninyo sa aking buhay. Sana sa munti kong ginagawa, naibabalik ko sa inyo ang nararapat.


Pahuling Salita:

Ipagpaumanhin po ninyo kung nahirapan kayong magbasa, ako man ay nahirapan din magsulat sa ating wikang Tagalog. Isa po lamang etong pagpapahalaga aking bayang sinilangan, sa pagdaraos ng Linggo ng Wika :)